1.1.) ما المقصود بكلمة تمثيل البيانات داخل الكومبيوتر؟

المقصود من كلمة تمثيل البيانات داخل الكومبيوتر باختصار شديد هو يعنى اذاي بتتكلم معاه بلغته؟ … يعنى ايه برضو.

قولنا في مخلص الكورس ان هدف علوم الحاسب هو دارسة الخوارزميات وقولنا ان خوارزمية معناها عدد من الخطوات اللى بنعملها عشان نحل مشكلة معينة …

تخيل معايا كدة انت معاك مشكلة وليك صاحب اجنبي (بيتكلم انجليزي) وهتطلب منه يساعدك وهتقوله الخوارزمية اللى هيعملها … انت عشان تقوله وتكلمه بتعمل ايه؟ … بتفكر بالعربي وتحول العربي بتاعك لإنجليزي … وهو ده معنى كلمة تمثيل البيانات … انت هنا عملت تمثيل للكلام بتاعك اللى باللغة العربية الى اللغة الإنجليزية.

نفس الكلام في الكومبيوتر … عشان تخليه ينفذلك خوارزمية معينة، يبقى لازم تكلمه وتقوله اللى انت عايزه بلغته.

وهنا نسال نفسنا سؤالين:

السؤال الأول: ايه هي لغة الكومبيوتر؟ هتقولي معروفة انها الصفر والواحد … صح … وبنمسيها binary language. binary معناها ثنائي وlanguage يعنى لغة وبالتالي بالعربي اسمها اللغة الثنائية وسمناها كدة عشان دي لغة مفهاش أي حروف او ارقام تاني غير الصفر والواحد. ويبقى كدة معنى كلمة تمثيل البيانات على الكومبيوتر هو اذاي بنحول الداتا من اللغة بتاعتنا الى الصفر والواحد.

السؤال الثاني: ممكن تقول انا أصلا بكتب على الكومبيوتر بلغتي عادي ومشبكتب بالصفر والواحد والكومبيوتر بيفهمنى عادي … فهل ده معناه انه هو بيحول الداتا اللى بدخلها للصفر الواحد؟  …الاجابة: اه بيتم تحويلها فعلا الى الصفر والواحد ولكن كيف او اذاي؟

خلينا نشرح اذاي بتم عملية التحويل دي؟ لما يكون فيه 2 لغاتهم مختلفة ومشبيفهمو بعض، ذي مثلا واحد مصري بيكلم واحد صيني، فالحل انهم يجيبو مترجم يكون بيفهم اللغتين يعنى يقدر يحول من عربي لصيني والعكس … ونفس الكلام لو انت هتدي خوارزمية للكومبيوتر عن طريق كتابة كود او حتى بتديله داتا، فالكود بتكتبه بحروف من لغتك انت وبنحتاج مترجم وبنسميه بالعربي محول برمجي او compiler بالانجليزي. هو اللى بياخد الكود بتاعك وبيحوله للصفر والواحد والعكس… وده طبيعي … وهيبقى فيه كورس ان شاء الله عن الكومبيلر.

عشان المترجم ده يعرف يشتغل لازم يبقى عارف هو اذاي هيحول من لغتك انت للغة الصفر والواحد … يعنى لازم يبقى عارف يحول الحروف والأرقام والعلامات الخاصة اللى في لغتك الى الصفر والواحد وكمان يبقى عارف اذاي يحول الصور والفيديوهات وملفات الصوت الى صفر وواحد… وده اللى هنشوفه في الشابتر ده.

1) كيف يتحدث الكومبيوتر لغة الصفر والواحد؟

احنا خلاص فهمنا اننا لازم نكلم الكومبيوتر بلغة الصفر والواحد او هنقول عليها خلاص الbinary language … بس السؤال هنا، هو اذاي أصلا الكومبيوتر ليه لغة وبيتكلم وهو أصلا جماد ومكون من اشباه موصلات؟ فاذاي الصفر والواحد موجودين على حاجة جماد؟

خلينا نستنتجها مع بعض.

ايه هي الحاجة الوحيدة اللى بتخلي الكومبيوتر يشتغل؟ الكهربة اكيد …. ممكن تسالني وتقول يعنى انت عايز تقول ان المعلومات او الداتا اللى بنشوفها على الكومبيوتر هي أساسا كهربة؟ او ان الصفر والواحد هي أصلا كهربة؟

 اه بالظبط … بس برضو اذاي؟

ايه هي الطريقة الوحيدة اللى بتستعمل بيها الكهربة؟ اكيد انك تشغلها يعنى ON وتطفيها يعنى OFF.

طيب ايه رأيك لو رمزنا للON ب1 والOFF ب0 …

ماشي بس برضو اذاي؟ مانا لو عملت OFF يبقى هفصل الكومبيوتر ….

خليني اشرحلك اكتر … احنا عارفين ان الكومبيوتر فيه وحدة معالجة مركزية اسمها CPU او central processing unit دي بتتكون من مجموعة من الدواير الكهربية وكل دايرة كهربية ممكن اعملها ON او OFF عن طريق حاجة اسمها transistor.

تتابع الON والOFF للدواير الكهربية دي هي ال0 وال1 …

ايه ده … يعنى هو مفيش اصفار ووحايد ماشية جوة الكومبيوتر؟ …. الحقيقة لا … هي مجرد نبضات كهربية ناتجة من داوير كهربية معمولها on و off بتتابع معين وبطريقة معينة عشان تمثل البيانات ودي الطريقة اللى بيتكلم بيها الكومبيوتر.

وفي الشابتر ده برضو هنتعرف على الدواير الكهربية.

امال ايه الصفر والواحد ده …. دي الطريقة اللى بنعبر بيها احنا عن الموضوع على الورق لكن فعليا هي مجرد دواير كهربية مشاكتر.

بس برضو فيه سؤال … ما معنى كلامك ان الكهربا هي الداتا يبقى لما بنفصل الكومبيوتر الداتا بتروح او بتتمسح وده مشبيحصل أصلا لكن احنا بنلاقي الداتا متخزنة على الhard desk عادي.

صح مظبوط … لما بتفصل الكهربا عن الكومبيوتر، الداتا اللى بتتمسح هي اللى موجودة في الRAM فقط (بالعربي ذاكرة الوصول العشوائي) ،و لكن الداتا اوالبيانات اللى على الhard desk بتكون ليها طريقة تخزين تانية غير الكهربة وهنتكلم عنهم كلهم في الكورس برضو.

وفي الفصل ده هنشوف اذاي بيتم تمثيل الأرقام والنصوص والفيديو والصوت بلغة الكومبيوتر او بمعنى اخر هنشوف كيف يتم تحويلهم الى 0 و1.